Zəlimxan Hüseynov — Vikipediya

Zəlimxan Hüseynov
Şəxsi məlumatlar
Tam adı	Zəlimxan Teci oğlu Hüseynov
Vətəndaşlığı	Rusiya → Azərbaycan
Doğum tarixi	13 iyul 1981 (42 yaş)
Doğum yeri	Xasavyurt, Rusiya SFSR
Boyu	174 sm. (5 ft 6 in)
Çəkisi	60 kq
İdman növü	Güləş
Karyera illəri	2002—2013
Məşqçisi	Teci Hüseynov
Komandası	Atasport İdman Klubu
Medallar Dünya Çempionatı Gümüş 2009 Herninq 60 Kq. Bürünc 2010 Moscow 60 Kq. Avropa Çempionatı Qızıl 2009 Vilnüs 60 Kq.

Zəlimxan Teci oğlu Hüseynov (13 iyul 1981; Xasavyurt, Rusiya SFSR) — 1999–2001-ci illərdə Rusiyanı, 2008–2013-cü illərdə isə Azərbaycanı təmsil edən sərbəst güləşçi, 2009-cu il Avropa Çempionatının qalibi.^[1]

Karyerası[redaktə | mənbəni redaktə et]

Zəlimxan Hüseynov 1999-cu ilin fevralında Rusiya Çempionatının qalibi olub.^[2] Həmin ilin aprelində Belarusda baş tutan Avropa Çempionatında mübarizə aparsa da, turniri 16 idmançı sırasında 15-ci pillədə başa vurdu.^[2] İyunda isə Zəlimxan Hüseynov Riqa şəhərində (Latviya) baş tutan gənclər arasında Dünya Çempionatının qızıl medalına sahib oldu.^[2]

Daha sonra Zəlimxan Hüseynov 2000-ci ildə Rusiya Çempionatını gümüş medalla başa vurdu.^[2] 2001-ci ildə isə Zəlimxan Hüseynov gənclər arasında Dünya Çempionatının bürünc medalına sahib oldu.^[2] Noyabrda isə o, Dünya Çempionatlarında debüt elədi və turniri 33 idmançı sırasında 8-ci pillədə başa vurdu.^[2]

Həmin illərdə Rusiya yığmasının lideri Afina Olimpiadasının qalibi Mavlet Batirov idi və Zəlimxan Hüseynov nüfuzlu beynəlxal turnirlərdə mübarizə apara bilmirdi.^[2] 2008-ci ildə Azərbaycan Güləş Federasiyası (AGF) Zəlimxan Hüseynovu Azərbaycan yığmasına dəvət elədi^[2]. Nəticədə Zəlimxan Hüseynov həmin dəvəti qəbul elədi və 2008-ci ildən Azərbaycan bayrağı altında beynəlxalq turnirlərdə mübarizə aparmağa başladı.^[2]

Zəlimxan Hüseynov 2008-ci ildə İsveçrədə Dünya Olimpiya Təsnifat Turnirini gümüş medalla başa vurdu və olimpiya lisenziyasına sahib oldu.^[2] Olimpiadadan əvvəl o, Qızıl Qran-Pri beynəlxalq turnirini beşinci pillədə başa vurdu.^[2]

Zəlimxan Hüseynov Azərbaycanı 2008-ci ildə Çində baş tutan XXIX Yay Olimpiya Oyunlarında təmsil elədi. Zəlimxan Hüseynov olimpiadanın təsnifat mərhələsində 2007-ci il Dünya və Avropa Çempionatlarının qalibi, 2004-cü il Afina Olimpiadasının çempionu Rusiya nümayəndəsi Mövlud Batirov ilə üz-üzə gəldi.^[3] Həmin görüşün birinci hissəsində rəqibinə 0:1 hesabı ilə məğlub olan Zəlimxan Hüseynov növbəti hissədə də rəqibinə minimal fərqlə məğlub oldu (0:1).^[3] Rəqibi final görüşünə vəsiqə qazandığına görə Zəlimxan Hüseynov təsəlliverici qrupda mübarizə apardı.^[3] Bu qrupun birinci görüşündə Zəlimxan Hüseynovun rəqibi 2004-cü il Afina Olimpiadasının qalibi Kuba nümayəndəsi Yandro Kintana oldu.^[3] Gərgin idman mübarizəsi şəraitində baş tutan görüşün birinci hissəsində Zəlimxan Hüseynov rəqibinə minimal fərqlə məğlub oldu (0:1).^[3] Görüşün növbəti hissəsi 1:1 hesabı ilə başa çatsa da, son xalı Zəlimxan Hüseynov qazandığına görə hissədə qalib gəldi.^[3] Görüşün həlledici hissəsində isə Zəlimxan Hüseynov rəqibi üzərində 5:4 hesabı ilə qələbə qazandı və bürünc medal uğrunda mübarizəsinə davam elədi.^[3] Növbəti görüşdə onun rəqibi KYRM nümayəndəsi Murad Ramazanov oldu.^[3] Həmin görüşdə Zəlimxan Hüseynov rəqibinə 2:0 (1:0, 4:1) hesabı ilə qalib gəldi və bürünc medal uğrunda görüşə vəsiqə qazandı.^[3] Həlledici görüşdə onun rəqibi 2006-cı il Dünya Çempionatının İran nümayəndəsi Murad Məhəmmədi oldu.^[3] Həmin görüşdə Zəlimxan Hüseynov rəqibinə 0:2 (0:2, 1:4) hesabı ilə məğlub oldu və olimpiadanı beşinci pillədə başa vurdu.^[3]

Olimpiadadan sonra Zəlimxan Hüseynov 2009-cu ilin yanvarında Rusiyada İvan Yarıginin xatirəsinə həsr olunan beynəlxalq turnirin bürünc medalına sahib oldu.^[2] Həmin ilin martında isə Zəlimxan Hüseynov Litvanın Vilnüs şəhərində Avropa Çempionatının qızıl medalına sahib oldu.^[2] Avropa çempionluğundan sonra Zəlimxan Hüseynov həmin ilin iyulunda Qızıl Qran-Pri beynəlxalq turnirinin də qalibi oldu, sentyabrda isə Dünya Çempionatını gümüş medalla başa vurdu.^[2]

2010-cu ildə Zəlimxan Hüseynov Rusiyada Dünya Çempionatının bürünc medalına sahib oldu.^[2] 2011-ci ilin fevralda İstanbul şəhərində Yaşar Doğunun xatirəsinə həsr olunan beynəlxalq turnirin qalibi olan Zəlimxan Hüseynov həmin ilin iyulunda Qızıl Qran-Pri beynəlxalq turnirinin də qalibi olsa da, sentyabrda İstanbul şəhərində Dünya Çempionatını 8-ci pillədə başa vurdu və olimpiya lisenziyasına sahib ola bilmədi.^[2] 2012-ci ilin fevralında Kiyev şəhərində beynəlxalq turnirdə uğursuz çıxış edən Zəlimxan Hüseynov bir il sonra idmanla vidalaşdı.^[2]

Nəticələri[redaktə | mənbəni redaktə et]

Sıra	İl	Yarış	Ev sahibi	Nəticə
Rusiya
1	1999	Avropa Çempionatı	Belarus	15.
2		Gənclərin Avropa Çempionatı	Latviya	1.
3	2001	Gənclərin Dünya Çempionatı	Özbəkistan	3.
4		Dünya Çempionatı	Bolqarıstan	8.
Azərbaycan
5	2008	Avropa Olimpiya Təsnifat Turniri	İsveçrə	2.
6		Qızıl Qran-Pri	Azərbaycan	5.
7		Olimpiya Oyunları	Çin	5.
8	2009	İvan Yarıgin Turniri	Rusiya	3.
9		Avropa Çempionatı	Litva	1.
10		Qızıl Qran-Pri	Azərbaycan	1.
11		Dünya Çempionatı	Danimarka	2.
12	2010	Dünya Çempionatı	Rusiya	3.
13	2011	Yaşar Doğu Turniri	Türkiyə	1.
14		G. Kartozia & V. Balavadze Turniri	Gürcüstan	7.
15		Qızıl Qran-Pri	Azərbaycan	1.
16		Dünya Çempionatı	Türkiyə	8.
17	2012	Kiyev Turniri	Ukrayna	17.

İstinadlar[redaktə | mənbəni redaktə et]