Kalbgâh-ı İslâm olan merkez-i saltanat-ı Osmaniyenin [İstanbul’un] düşmân işgâline geçmesi ve bütün vatan ve milletimizin en büyük tehlikeye ma‘rûz kalması netîcesi olarak bütün Rumeli ve Anadolu’nun girişdiği millî ve mukaddes mücâhede esnâsında efrâd-ı milletin dâhilî ve hâricî en sahîh havâdis ile tenvîri ihtiyâc-ı mübremi nazar-ı dikkat ve ehemmiyete alınmış ve bi’n-netîce burada en salâhiyetdâr zevâtdan mürekkeb bir hey’et-i mahsûsa idâresinde ve (Anadolu Ajansı) unvânı altında bir mü’essese vücûda gelmişdir. Anadolu Ajansının en serî‘ vesâ’it ile vereceği havâdis ve ma‘lûmât esâsen Hey’et-i Temsîliyemizin menâbi‘-i asliye ve mevsûkası mâ-hasalı olacağı cihetle bu ajans teblîgâtının oraca ve ez-cümle Müdâfa‘a-i Hukûk teşkîlâtımızca dahi memer ve mecma‘ olan yerlere ta‘lîki, tab‘ ü teksîri ile tevzî‘i ve hattâ nâhiye ve köylere kadar îsâli yolunda mümkün olduğu kadar fazla intişâr eyleyebilmesi için tertîbât-ı müsta‘cele alınması ve netîceden ma‘lûmât i‘tâsı ehemmiyetle ricâ olunur.